¡Todas somos YPJ

MOBILIZACIÓN INTERNACIONAL EN APOIO ÁS UNIDADES DE DEFENSA DAS MULLERES EN ROJAVA

Dende o acordo do 29 de xaneiro entre as Forzas Democráticas Sirias e o Goberno de Transición Sirio, a violencia física trasladouse ao ámbito político, un espazo do que as mulleres foron excluídas durante a maior parte da historia rexistrada. Aínda que durante máis dunha década as mulleres do nordeste de Siria traballaron para construír un sistema que as inclúe en todos os aspectos da vida pública, os seus logros están agora ameazados polos intereses de estados gobernados por homes patriarcais. En resposta á ameaza crecente, a Plataforma Conxunta de Movementos e Organizacións de Mulleres lanzou unha serie de campañas para protexer os seus dereitos e destacar os seus logros.

As mulleres defenden as Unidades de Protección da Muller

O 26 de abril, no Estadio 12 de Marzo en Qamishli, a Plataforma Conxunta de Movementos e Organizacións de Mulleres de Rojava e Siria anunciou unha campaña en apoio ás Unidades de Protección da Muller (YPJ) có lema 'Todas somos YPJ! Autodefensa é o noso dereito natural'.

Numerosos grupos, organizadores, activistas, intelectuais e aliados reuníronse no evento, coreando lemas en apoio a unha forza armada exclusivamente feminina e ondeando bandeiras da Kongra Star. Reflectindo o compromiso da Administración Autónoma coa diversidade rexional, a Plataforma emitiu un comunicado en kurdo, árabe e siríaco, no que pide o recoñecemento oficial das YPJ como forza armada regular dentro do Ministerio de Defensa sirio e subliña a necesidade de protexer os dereitos das mulleres. "Nos últimos anos, as YPJ foron unha das forzas máis destacadas na loita contra o terrorismo, establecendo un exemplo excepcional na defensa da humanidade, a dignidade e a liberdade", sinala o comunicado, que destaca o alto prezo pagado polas combatentes destas unidades nos seus esforzos por protexer a sociedade siria e á humanidade en xeral. A Plataforma Conxunta fixo un chamamento a todos os movementos e organizacións de mulleres, ás forzas democráticas e ao pobo de Kurdistán e de todo o mundo para que apoien a súa campaña e amosen solidariedade coas YPJ. Pouco despois do anuncio oficial, máis grupos sumáronse ao chamamento.

Apoio global

En Rojava, as Mulleres Novas Internacionalistas uníronse á mobilización en liña. "Hoxe, as YPJ declaran o seu compromiso de asegurar o futuro dunha Siria democrática e libre e a defensa das mulleres", dixo unha membro nun vídeo publicado en Instagram, instando a todas as forzas democráticas a facer o mesmo. TAJÊ, o movemento pola liberdade das mulleres yazidís no nordeste de Siria, declarou a súa profunda solidariedade coas YPJ. A Organización para a Autonomía da Muller anunciou o seu apoio total ás Unidades de Protección da Muller (YPJ). O 6 de maio, centos de persoas saíron ás rúas de Qamishli para manifestarse a favor da integración das YPJ no exército sirio, dos dereitos das mulleres e da democracia.

'Mulleres en Defensa de Rojava' (WDR) lanzou hai unha semana unha campaña para defender os logros das mulleres na rexión, que inclúen a participación política, a educación para a igualdade social e cultural, e un modelo de autoorganización que promove un xeito de vida democrático e ecolóxico. Dende o 21 de abril, publican artigos e vídeos nas redes sociais e en liña, explicando o sistema construído ao longo dunha década e demostrando a súa importancia. "Desde o inicio da guerra de agresión o 6 de xaneiro, as mulleres e as súas institucións sufriron ataques de forma sistemática, liderados polo Goberno de Transición Sirio e polo estado turco", afirman, instando a outros a sumarse á chamada.

Mulleres de todo o mundo, incluíndo Polonia, Cataluña e Italia, uníronse á campaña, tanto individualmente como en grupos, traducindo materiais, construíndo redes e levando a cabo accións de solidariedade. En Bélxica, as mulleres en Bruxelas relacionaron as loitas obreiras do 1 de maio coa loita pola liberación das mulleres en Rojava e en todo o mundo, e enviaron o seu apoio ás Unidades de Protección das Mulleres. Un colectivo italiano composto por varios grupos emitiu unha declaración de solidariedade coa acción, ondeando as bandeiras das Unidades e sostendo unha pancarta co lema "Todas somos YPJ", mentres que outras gravaron unha canción. As mulleres en China expresaron a súa solidariedade cun vídeo impactante creado por Mistana, usando a peza "War Fox" como música de fondo; a canción foi composta en 2015 por YuLi e foi escrita orixinalmente para apoiar á YPJ.

No seu sitio web, a campaña WDR—que coordina a resistencia internacional en solidariedade coa revolución—enumera moitas accións e medidas que se poden adoptar para apoiar o chamamento "Somos todas YPJ", como proxectar películas, concienciar sobre a importancia de Rojava, enviar vídeos de solidariedade e participar en eventos en liña."As YPJ son a nosa razón de ser, a nosa vontade e a nosa representación!" coreou unha moza do Kurdistán do Sur nun vídeo recopilatorio de membros de Kongra Star en apoio ás forzas integradas só por mulleres. Dende a súa creación, as Unidades de Protección das Mulleres foron máis que unha forza militar: converteronse nun símbolo do verdadeiro potencial, sacrificio e esperanza das mulleres. A súa dedicación á protección dos membros máis vulnerables da sociedade e a súa determinación para cambiar o sistema opresor inspiraron a millóns de persoas en todo o mundo."O noso traballo non se limita a isto", dixo Emîne Osê, portavoz do Comité de Relacións Democráticas e Alianzas de Kongra Star, cando Lêgerîn lle preguntou pola campaña, referíndose a todas as actividades levadas a cabo ata agora. "No futuro tamén haberá exposicións, obras de teatro, reunións e historias sobre a resistencia e os seus anos de loita." Engadiu que agardan que outros grupos, organizacións estranxeiras, influencers, académicos e xornalistas aborden este proceso de xeito responsable, xa que é unha cuestión de democracia e ética: é a loita de miles de mulleres que, durante catorce anos e con grandes sacrificios, configuraron a conciencia social, participaron activamente na protección da súa rexión e loitaron contra todo tipo de ataques inhumanos.

Unímonos ao chamamento: todas nós somos YPJ

Nós, a revista xuvenil internacionalista Lêgerîn, unímonos á campaña en defensa das YPJ. A revista Lêgerîn naceu da revolución de Rojava, do espírito e das accións dos valentes compañeiros e compañeiras que a fixeron posible. Tomamos o noso nome en honra de Alina Sánchez, unha moza internacionalista arxentina que se uniu ás YPJ durante a loita contra o ISIS, adoptando o nome de Lêgerîn Çîya, 'En busca das montañas'. Traballou como médica en Rojava ata que morreu nun accidente de tráfico en marzo de 2018. Compartimos a tarefa de construír conexións e solidariedade entre as mulleres de todo o mundo, inspiradas por Alina e moitas outras coma ela. Unímonos á campaña para defender as mulleres que loitan por todas nós. Podemos protexernos e apoiarnos mutuamente, loitando xuntas e inspirándonos unhas ás outras. A loita das YPJ é a nosa loita.

#WeareallYPJ